المخرجة شيماء طافش تكتب إمكانية فيلم مستقل وبروفيشنال في نفس الوقت
صعب إنك تعمل فيلم مستقل ..
الأصعب إنك تعمل فيلم مستقل وبروفيشنال ف نفس الوقت ..
عملية صناعة الأفلام وخصوصا الأفلام القصيرة عملية معقدة مش بس بتحتاج فلوس لاء ومجهود ذاتي وفكري وفريق عمل ..
هي صناعة لوحدها كدة مش هيتحملها غير اللي بيحبها
اللي فاكر أنه ياما هنا ياما هناك ف الشغلانة وهيجي يعمل فيلم قصير بصباعه الصغير أحب أقوله إنك غلطان ..
حضرتك جربت تعمل فيلم قصير قبل كدة
يبقي متتكلمش .. 
متتكلمش إنك تحكم ع حد لا بوقت ولا بغيره ..
لما يكون مش معاك شركة إنتاج كمخرج وبتعمل كل حاجة بمجهودات ذاتية وطالع عينك وبتجمع فريق عمل ..
وبتعد سنيين تحضير وتنفيذ وبوست برودكشن
لحد ما روحك تطلع حرفيا بطلوع الفيلم للنور ..
ويجي واحد يقولك الأفلام القصيرة ليس لها قيمة
ده ممكن أي حد يجي يعمل فيلم بموبايل ..
طب حضرتك ورينا تجاربك كدة هتلاقيه أصلا معندوش تجارب ..
حضرتك حتي الأفلام اللي بتتعمل بالموبايل مش سهلة ..
حد فاهم يعني إيه يختار كادرات ويظبط إضاءة ويجرب ويحاول ..
الحقيقة أنا بحترم أي حد بيحاول يعمل أي حاجة ف الزمن ده ..
أي حد بيسعي ويحاول يدخل أي مهرجان ..
كل مكان له إحترامه سواء كان مهرجان لسه بيبدأ أو مهرجان بقاله سنيين ومعروف ..
هنلاقي برده ناس غريبة تقلل من اللي قدامها وتقولك يا عم ده داخل مهرجانات تحت السلم ..
هو كدة أي حد بينجح بيطلعله حد مبيفهمش حاجة ومش عارف يعمل زيه يعد ينظر عليه ..
نصيحتي بقي إنك ترد ع الناس اللي زي دي بالنجاح إنجحوا وبس ..
جرب وحاول واسعي وانجح وتقوم وتقع مرة وعشرة ..
وأن ليس للإنسان إلا ما سعي وأن سعيه سوف يري ..
وإنك تجرب حاجات مختلفة مرة مستقل ومرة تلاقي دعم محترم ..
مرة كدة ومرة كدة لحد ما تكون خبرات مختلفة وتجيلك فرصة كويسة فتعرف تتعامل معها .. 
أي فرصة هتتحط فيها ف الحقيقة هي مش سهلة وهتحتاج منك مجهود كبير عشان تقدر تطلع حاجة محترمة ..
إحنا مش بنعمل أفلام ع التيك توك ..
إحنا بنعمل أفلام فيها فكر ووعي وثقافة ..
أفلام عايزة تقول حاجة وتعيش ..
وتأثر ف الناس بغض النظر عن الجوائز ..
كفاية رأي الجمهور فيها بعد العرض ..
البقاء للمستمر ..
🖤🖤🖤