وانا نازل فى ميدان الجيزة رايح لمحطة القطر 3حوادث كانوا هايحصلولى فى ساعة زمن عربية كانت هاتخبطنى حيث واحدة ست طالعة بعربيتها من بنزينة مصر وجت ورايا فجأة لولا انى قفزت يمين وبعدها بتقولى متأسفة ما اخذتش بالى ومشيت روحت اشتريت زجاجة عصير زبادو اروق دماغي ومليش نصيب فيها .
وبعدها الأسوأ لاقيت واحد بلطجى شبه البلطجي صرصار اللى كان بمسلسل ابن حلال اللى عمل دوره الممثل مراد فكرى عايز يسرق موبايلى ووقفنى البلطجى على جنب بيقولى عايز موبايلك اكلم خطيبتى فقولت للبلطجى مش معى رصيد ورد طب اطلب نجمة شباك يجيلك رصيد ورديت خد اشرب عصير الزبادوه ده وفك ريقك وفكك منى ( إن كان البلطجى خاطب فعلا اصلا ) واخد البلطجى العصير وبعده البلطجى قالى طب انا اخدت بق خد كمل انت باقى العصير قولتله مش عايزه خد الازازة كلها حلال عليك .. وبعدها مشيت بعيد عن البلطجى.
وبعدها ماشى فى طريقى لمحطة قطر الجيزة عربية تخبط موتوسيكل وصاحبه يطير عليه واقفز شمال والموتوسيكل وصاحبه يقع على واحد فارش بتاع لعب اطفال وسائق الموتوسيكل اتصاب وروحت طلعت زجاجة مياه ومناديل أعطيته للمصاب والناس كلها اتلمت طبعا عشان تساعد سواق الموتوسيكل المصاب.
ركبت القطر اخيرا وحمدت ربنا و قولت انا افضل صاحى ما أنامش لحسن حد ينشل موبايلى المرة دى.