الإعلامية ياسمين محمد تكتب : قوة الاستغناء

لازم تتعودي تعيشي لوحدك… لأن الوحدة مش ضعف، الوحدة قوة تخوّف

لازم تتعودي تعيشي لوحدك،
مش علشان مفيش حد في حياتك،
لكن علشان تبقي قادرة تعيشي حتى لو كل الناس مشيت.

الوحدة فيها قوة تخوّف،
هي قوة الاستغناء،
إنك تقدري تستغني أصلًا،
الاستغناء في حد ذاته قوة رهيبة،
ما بالك بقى لما الاستغناء ده يبقى عن البشر.

قوة الاستغناء مش معناها كره،
ولا قسوة،
ولا انعزال،
هي معناها إنك مش معلّقة روحك برقبة حد،
ولا حياتك واقفة على مزاج شخص،
ولا سعادتك مربوطة برسالة أو مكالمة.

إنتِ عارفة يعني إيه تقدري تستغني عن البشر؟
يعني يتعمل لك ألف حساب وحساب.
يعني اللي هيدخل حياتك يدخلها بلهفة وتمنّي،
مش داخل لأنه عارف إنك مش هتمشي.
يعني عمره ما يفكّر يخرج منها باستخفاف،
لأنه عارف إنك قادرة تكمّلي من غيره.

الاستغناء بيغيّر المعادلة.
بيخلّي وجودك اختيار،
مش احتياج.
بيخلّي كلمتك ليها وزن،
وصمتك ليه هيبة،
وقرارك ليه احترام.

على فكرة، الوصول لقوة الاستغناء والاستغناء عن البشر
مش حاجة صعبة خالص.
هي بس محتاجة خطوات،
ومحتاجة تدريبات،
ومحتاجة شوية مواجهة مع نفسك،
وشوية إعادة ترتيب لأولوياتك،
وشوية جرأة إنك تفكي التعلّق المرضي.

الموضوع مش قسوة،👌
الموضوع نضج.💛
مش هروب،✋️
الموضوع توازن.👌
إنك تحبي… بس تقدري تمشي💛
تدي… بس من غير ما تتكسري💛
تقربي… بس من غير ما تضيعي نفسك💛